Archive for August 18, 2009

రెండుపుస్తకాల ఆవిష్కరణ సభ విశేషాలు!

ఆదివారం, అంటే, 17.8.2009 నాడు, రాజమండ్రి లోని బ్రౌన్ మందిరంలో ఒకేసభలో రెండు పుస్తకాల ఆవిష్కరణ జరిగింది. నిజానికీ పుస్తకాలు ఇంతకుముందే ఆవిష్కృతమయ్యాయి. కానీ, రాజమండ్రి వాసులకోసం మరోసారి ఆవిష్కరించాలని నిర్ణయించారు. పుస్తకావిష్కరణ చేసింది, శ్రీ అవంత్స సోమసుందరం గారు. ఆవిష్కృతమయిన పుస్తకాలు, దేవులపల్లి కృష్ణమూర్తిగారు రచించిన, ఊరు వాడ బ్రతుకులు, కేపీ అశోక్ కుమార్ రచించిన, కథావలోకనం లు. ఊరువాడబ్రతుకులు పుస్తకం గురించి, యెండ్లూరి సుధాకర్ గారు, కోడూరి శ్రీ రామ మూర్తిగారు మాట్లాడేరు. కథావలోకనం గురించి, మనోజ గారు, నేను మాట్లాడేము. సభాధ్యక్షత బాధ్యతను శ్రీ జయధీర్ తిరుమలరావుగారు నిర్వహించారు. పుస్తకాలను ఆవిష్కరిస్తూ అవంత్స సోమసుందరం గారు చాలా గొప్పగా మాట్లాడేరు. విమర్శకుడు పుస్తకంలోని మంచిని మాత్రమే కాదు, లోపాలను కూడా ఎత్తిచూపించాలన్నారు. విమర్శకుడు రచనను చదవటంలో పాథకుడికి దృష్టిని ఇస్తూనే, రచనను మరింత మెరుగులు దిద్దటంలో రచయితకూ సూచనలివ్వాలన్నారు. అని, ఊరువాడబ్రతుకులు పుస్తకంలోని గుణాలను వివరించారు. తాననుకుంటున్న లోపాలను ఎత్తిచూపారు. రెండవ ప్రతిలో రచయిత ఈదోషాలను సవరించుకోవాలన్నారు. దానికి స్పందిస్తూ, యెండ్లూరి సుధాకర్, ఆ రచనలోని పద్మశాలీల, దళితుల జీవన సంస్కృతులను వివరించిన విధానాన్ని ప్రకటిస్తూ, రచనలోని సామెతలను, దాదాపుగా 40 పైన, వివరించారు. ఆవెంటనే కోడూరి శ్రీరామమూర్తి మాట్లాడుతూ, ఈరచనను మెమోయిర్స్ గా పరిగణించాలన్నారు. మనోజగారు అశోక్ కుమార్ కథావలోకనంలోని నాలుగు వ్యాసాలను లోతుగా విశ్లేషించారు. ఈ పుస్తకం రీసెర్చ్ చేయాలనుకునేవారికి ఆలోచనలనిస్తుందన్నారు. అప్పటికే ఆలస్యమయిపోయింది. రాత్రి ఎనిమిదిన్నరకు మేము తిరుగు బళ్ళు పట్టుకోవాలి. అందుకని నేను రెండు ముక్కల్లో నా ఉపన్యాసాన్ని ముగించాను. ప్రస్తుతం ఉన్న విమర్శకులను వర్గీకరించి, వివరించి, ఇలాంటి విమర్శకులున్న పరిస్థితిలో అశోక్ కుమార్ లాంటి అసలయిన విమర్శకుల పుస్తకాల అవసరం ఎంతో వుందని చెప్పి, నా మాటలలో నిజం ఈ పుస్తకం చదివి తేల్చుకోండి అని ముగించాను. నేను చేసిన విమర్శక వర్గీకరణను భవిష్యత్తులో వీలుననుసరించి ప్రత్యేక టపాలో రాస్తాను. అలాగే, అవంత్స సోమసుందరం గారు ఊరువాడబ్రతుకులపైన చేసిన విమర్శ, దానికి యెండ్లూరి సుధాకర్, కోడూరిల సమాధానాలకు నా స్పందనను త్వరలో ఆ పుస్తక సమీక్షలో తెలుపుతాను. సభ కాగానే గబ గబా భోజనం ముగించి పరుగెత్తి బస్సులోకి దూకాము. హైదెరాబాదు వచ్చి కళ్ళు తెరిచాము.

ఊరువాడ బతుకు, దేవులపల్లి కృష్ణమూ,ర్తి హైదెరాబాద్ బుక్ ట్రస్ట్ ప్రచురణ  ,వెల- 40/- కథావలోకనం, కేపీ అశోక్ కుమార్, పాలపిట్టప్రచురణ, వెల- 50/-.

August 18, 2009 · Kasturi Murali Krishna · No Comments
Posted in: పుస్తక పరిచయము